Uyghur Jemiyiti: Biz milletni tenqitleshke hazirmu?

Biz, milletni tenqitleshke yaki milletning eyipini ichishqa hazirmu?

Awazliq nusqisi

كونا يىزىق نۇسقىسى ئۈچۈن بۇ يەرنى بىسىڭ

https://uyghur-jemiyiti.blogspot.com/2019/02/blog-post_5.html

Memet Emin

“Biz öz ara itipaqlashmaydighan millet. Biz tirishmaydighan millet. Biz kitap oqumaydighan millet. Biz tereqqi qilmaydighan millet. Biz mushu seweplerdin hazirqi halgha chüshüp qalghan millet.” Ishinimenki köpünchimiz bu xildiki milletni tenqitleydighan tapatene sözlerni we shikayetlerni anglighan, we uninggha qarita, “hemme milletning özige chushluq artuqchiliqi we kemchilliki bar, hazir bularni talash tartish qilidighan waqit emes” we “biz milletning eyipini ichip, düshmenni xosh qilmasliqimiz kirek”digendek inkaslarni qayturghan, yaki milletning illetlirin tenqit qilghuchilargha qitilip, “kiselni dawalash üchün aldi bilen uninggha toghura diyagunuz qoyush kirek, eger biz özimizning kemchillikini tonup yetmisek, bizde qandaq ilgirlesh bolsun?” digendek öz köz qarashlirimizni oturgha qoyghan.

Shundaq, bizde “kiselni yoshursang, ölüm ashkare” deydighan ata söz bar. Insan eger özide özgürüsh peyda qilay dise, choqum öz xataliqini tonup yitishi, uni itirap qilishi we öz özini tenqit qilishi kirek. Pütün bir milletmu, eger özide özgürüsh peyda qilay dise, choqum öz illetlirini we eyiplirini tonup yitishi, uni itirap qilishi kirek. Biraq bu yerdiki öz özini tenqit qilish hergüzmu nuqul haldiki öz özini eyiplesh, öz özining eyipini ichish bolmastin, belki özide ijabi özgürüsh peyda qilish üchün, öz özige adil baha birish arqiliq, öz xataliqini, öz kemchillikliri we yitersizliklirini tonup yitip, uningda ilgirlesh we yaxshilinish peyda qilishni közde tutidu.

Herqandaq bir shexis, herqandaq bir gurpa we yaki herqandaq bir millet, öz xataliqigha ige chiqip, öz qilmishigha mesul bolup, özide özgürüsh peyda qilalishi üchün, aldi bilen özige öz igedarchiliq qilalishi, nime qilish, nime sözlesh, qandaq qilish, qandaq sözleshke özi qarar birelishi kirek. Eger undaq bolmighanda u shexis, u gurpa we yaki u millet ötküzgen xataliq, we uni özgertish ularning ilkide bolmaydu. Meyli shexis bolsun we yaki pütün bir millet bolsun, öz özini tenqit qilishning aldinqi sherti, aldi bilen u shexis yaki u millet öz özini qobul qilishi, özige mihriban bolishi, öz özini qoghdiyalaydighan we öz özige xoja bolghan bolishi kirek.

Hazir, gerche her birimiz bolupmu muhajirette yashawatqan Uyghurlar ayrim ayrim shexis bolush süpiti bilen belguluk heq hoquqlargha ige bolsimu, biraq Uyghurlar pütün bir millet bolush süpiti bilen, hich bir jehette özige özi ige chiqish, özige özi xoja bolush, musteqqil tepekkur qilish we musteqqil pikir yürgüzüsh hoquqigha ige emes. Uyghur xelqi, pütün bir millet bolush süpiti bilen nime sözlesh, nime qilish, qandaq sözlesh, qandaq qilish qatarliqlargha özi qarar birelmeydu. Uyghur milliti, pütün bir millet bolush süpiti bilen, öz xelqini, öz qimmet qarashi, öz itiqadi we öz exlaq pezilet ölchimi bilen terbilesh hoquqigha ige emes. Uyghur milliti, pütün bir millet bolush süpiti bilen, öz tarixini tetqiq qilish, ügünüsh we ügütüsh hoquqigha ige emes. Hazirqi sharahitta Uyghur millitidiki kisel meyli yoshurulsun we yaki uninggha iniq diyagunuz qoyulsun, millet uni saqaytish imkaniyitige, yeni özidiki nurghun mesililerde we illetlerde özgurush peyda qilish imkaniyitige ige emes. Hazirqi sharahitta bizning, milletni eyiplishimiz, milletning eyipini ichishimiz hergüz ijabi rol oynimaydu, eksinche u milletke selbi tesir körsütüp, millette ümütsizlik peyda qilidu. Shu seweptin men, "hazir milletni bir gewde süpitide tenqit qilidighan we yaki milletning eyipini achidighan toghura zaman emes" dep qaraymen.

Miningche biz eng yaxshisi milletni tenqit qilishning ornigha öz özimizni tenqit qilishni, sewenlikni millettin izdep, mesulyetni milletke yükleshning ornigha, öz özimizdin "men milletning bir ezasi bolush süpitim bilen, öz mesulyitimni ada qildimmu?" dep sorap biqishimiz kirek. Hazir bizge nisbeten eng mohim bolghini, özimizge bolghan mihribanliq, yeni öz ara köyünüsh, öz ara destek bolush, akitip muhit yaritish we öz mesulyitimizni ada qilishtur.

Öz özimizge bolghan mihribanliq bek mohim, chünki eger biz xorluq ichide öz özimizge köyünelisek, andin biz bashqilargha qol uzitalaydighan, bashqilar bilen alaqe ornitalaydighan we bashqilarning derdige derman bolalaydighan bolimiz.

Öz özige mihriban bolush (self compassion) digende öz özige köyünüsh (self kindness), ortaq insanliq (common humanity) we tonup yitish (mindfulness) qatarliq mezmunlarni öz ichige alidu. Öz özige köyünüsh (self kindness) diginimiz insanning özini toluq tonup yitishini, özige shepqetsizlik bilen höküm chiqarmasliqni, özining yitersizliki sewebidin özige hujum qilmastin, belki özige yaxshi muamile qilip, özini shertsiz qobul qilishni közde tutidu. Ortaq insanliq (common humanity) diginimiz insanning nuqsansiz emeslikini, hemme ademning meghlup bolidighanliqini, xataliq ötkizidighanliqini, hemme ademning bishigha oxshimighan dertlerning kilidighanliqini tonup yitip, mükemmelsizlikning hayatimizning bir qismi ikenlikini her daim este saqlap, bashqa bala kelgende özimizni yalghuz his qilmasliqimizni közde tutidu. Tonup yitish yaki tuyush (mindfulness) digende insanlarning qayghusini we yaki bishigha kelgen kilishmesliklerni yaxshi küzütüp, hem ularning his tuyghusini körmeske salmasliqni, hem ularning bishigha kelgen qayghu herserlirini we balayi apetlerni köptürüp, ularning derdige dert qoshmasliqni közde tutidu. Öz özige mihriban bolmighan, yeni öz özige köyünmigen insanning, bashqilargha hisidashliq qilalishi, bashqilargha köyünishi mümkin emes.

Öz özimizge mihribanliq bolsa, insanning bolupmu kirizisqa we meghbubiyetke duch kelgenide, öz özige destek bolushi we öz özige köyünüshi bolup, u insanlarning herketlendürgüch küchi we öz özini konturul qilishi bilen zich baghlinishliq

Öz özini tenqit qilish (self criticism) diginimiz, insanlarning öz özige baha birishning bir xil usuli bolup, uni akitip we passip bolghan öz özini tenqit qilish dep ikki xilgha ayrish mümkin. Akitip bolghan öz özini tenqit qilish diginimiz özini qobul qilghan asasta bolidighan öz özini tenqit qilish bolup, u insanlargha ijabi tesir körsitidu. Passip bolghan öz özini tenqit qilish diginimiz öz özini qobul qilmighan asasta bolidighan öz özini tenqit qilish bolup, u öz özini ret qilish we öz özini inkar qilishlarni öz ichige alidu we insanlargha selbi tesir körsitidu. Passip bolghan öz özini tenqit qilish, insanlarda öz özini kemtük tonush (disrupted self-identity) xarektirliq pisxilogoyelik binormalliq peyda qilidu.

Öz özige mihriban bolush we öz özini qobul qilish bilen öz özini tenqit qilish adette bir biri bilen öz ara zich baghliship ketken bolup, ular arisida her zaman melum tengpungluq bolushi kirek. Öz özige mihriban bolmighan we öz özini qobul qilmighan, noqul haldiki öz özini tenqit qilish, yeni özini inkar qilish we özini ret qilish bolsa, bir xil passip bolghan binormal qilmish bolup, u insanlarni, chüshkünlikke, öz özini kemsitishke, öz özini jazalashqa, öz özini weyran qilishqa we meghlubiyetke bashlap baridu. Tetqitqat netijilirige asaslan'ghanda, öz özige mihriban bolush yitersiz bolghan, biraq öz özini tenqit qilish asasi orunda turidighan insanlarning chüshkünlishish kisilige giriptar bolush ihtimali alahide yuquri bolghan. Eger insanlarning öz özige hisidashliq qilish istiki bek küchlük bolup, hemme ishta peqet özini oylaydighan, özini merkez qilidighan bolsa we uninggha mas halda öz özini tenqit qilish bolmisa, undaq insanlarda uchigha chiqqan shexsiyetchillik we zomigerlik xaishi peyda bolidu, netijide chong xataliq we weyran bolush kilip chiqidu.

Insan, öz özini qobul qilishi kirek, bolmisa öz özi bilen pitishalmaydu. Insan, öz özini tenqit qilishi kirek, bolmisa bashqilar bilen pitishalmaydu.

Normalda, her qandaq musteqqil bir shexis belgülük dairde özining nime qilishigha özi qarar bireleydu. Yeni u shexis meyli yaxshi qilsun yaki yaman qilsun, toghra qilsun yaki xata qilsun, uninggha özi qarar biridu, we shu seweptin özining qilghinigha özi ige chiqishi yaki özi mesul bolishi kirek. Eger xata qilghan bolsa, xataliqini tonup yitip, öz özini tenqit qilishi, bir xil mesulyetchanliq, dadilliq we mertlik. Biraq her birimiz milletning bir ezasi bolush süpitimiz bilen pütün bir milletni tenqit qilishqa, uning eyipini ichishqa kelgende ishlar undaq addi emes.

Aldi bilen, millet hemmimizge tewe, biraq millet hich birimizning shexsi tewerüki emes. Millet digen ortaq til, ortaq mediniyet, ortaq jughrapiye we ortaq tarixqa ige bolghan bir gurpa kishilerning ortaq nami. Millet, u bir abistrakit uqum bolup, u nurghunlighan konkirit insanlar toplimidin teshkil tapqan, yeni konkirit insanlarsiz, millet yaki xelq mewjut bolmaydu. Shu seweptin eger biz özimizdiki bezi illet we yitersizliklerni universallashturup, uni noqul halda milletning üstige yüklisek, toghura bolmaydu. Eger biz özimizdiki mesilini xelqke, milletke artip, xelqni, milletni eyiplep, özimizni uning sirtigha qoysaq, öz mesulyitimizdin qachqan bolimiz.

Milletning mesilisi dimek bizning ortaq mesilimiz dimek. Milletning illiti dimek her birimizning, kem digende köpünchimizning illiti dimek. Milletning nomusi dimek her birimizning nomusi dimek. Milletning shan sheripi dimek her birimizning shan sheripi dimek. Her birimizning küchlinishi milletning küchlinishidur; her birimizdiki ortaqliqning weyran bolishi we yoqilishi milletning yoqilishidur.

Ikkinjidin, her birimiz öz aldimizgha ayrim ayrim musteqqil bir shexis bolush süpitimiz bilen, öz özimizni tenqit qilish erkinlikimiz bar, biraq her birimiz bir shexis bolush süpitimiz bilen milletni tenqitlimekchi bolghanda we yaki milletning eyipini achmaqchi bolghanda, omumluqni közde tutishimiz, milletning menpetini asasi orunda qoyishimiz, hisyatimizgha tayinip he digende milletni eyipleshtin saqlinishimiz kirek.

Bizning öz özimizni tenqit qilishimizdin mexset özimizde ijabi özgürüsh peyda qilish üchündur. Milletni tenqit qilish we yaki milletning eyipini ichishmu del shu milletning ehwalida ijabi özgürüsh peyda qilish üchündür. Shexislerning illiti köpünche halda shexsi qilmish bilen munasiwetlik bolsimu, biraq milletning illetliri köpünche halda shu millet yashighan ijtimayi jemiyet qurulmisi, milletning shu jemiyettiki orni, öz özige xoja bolush ehwali qatarliq köp xil amillar bilen munasiwetlik. Millet, özidiki illetlerni özgertish üchün, aldi bilen u illetlerge sewep bolghan ijtimayi qurulmida özgürüsh peyda qilalalishi kirek. Millet öz özige ige chiqalishi, özining qimmet qarishi, itiqadi we exlaq pezilet ölchimi boyiche ish körelishi kirek, kiyinki ewlatlirini shu boyiche terbiliyelishi kirek.

Biz normalda yalghuz özimizge emes, öz his tuyghimizgha asaslinip turup, pütün bir milletke we xelqke wekilliq qilip yaki ular toghursida universal yekün chiqirishqa adetlen’genmiz. Mesilen Uyghurlar eqilliq millet, Uyghurlar tirishchan millet, Uyghurlar horun millet we yaki Yehudilar undaq millet, Yapunluqlar mundaq, In'gilizlar undaq millet, Girmanlar mundaq millet digendek. Emiliyette biz melum milletni teripleshte ishlitip kelgen herqandaq alahidilik shu milletke tewe bolghan köp sandiki kishilerdiki ortaq alahidilik bolup, u hergüzmu millettin ibaret abistirakit bir uqumgha tewe emes, belki konkirit insanlargha tewe alahidiliktur.

Hemmimizge melum bolghandek, hazir bir insanning eqil parasitini ölcheydighan ölchem IQ yeni eqil kösetküchisi bolup, oxshimighan irqi we oxshimighan millertlerning oturche eqil kösetküchisi periqliq bolsimu, yeni bezi milletning oturche eqil kösetküchisi yuquri, bezi milletning oturche eqil kösetküchisi töwen bolsimu, biraq men melum millet eqilliq millet, melum millet döt millet digen uqumgha men qitilmaymen.

Herqandaq bir millet bir pütün bir gewde bolush süpiti bilen omum yüzlük eqilliq yaki omumi yüzlük döt bolmaydu. Peqet her bir milletni teshkil qilghan insanlar ichide eqilliq insanlar we döt insanlar bolidu. Insanlarning eqil kösetküchisining yuquri töwen bolushi yalghuz insanlarning irsi we yaki tughma eqil parasiti bilen munasiwetlik bolup qalmastin, u yene muhit we sharahitqimu baghliq. Shuni tekitlep ötüshke erziduki, oxshash insan oxshimighan waqitta eqil kösetküchisini tekshürtkende, uning netijisi periqliq bolishi mümkin. Shu seweptin köpünchi kishiler, insanlarning eqil kösetküchisini, insanlarning eqlini ölcheshning ölchimi qatarida ishlitishke qarshi turmaqta.

Undin bashqa melum bir milletning tereqqi qilishi yaki qilmasliqi, yalghuz u miletning eqilliq yaki emesliki bilen munasiwetlik bolup qalmastin, belki u shu milletke tewe bolghan ijtimayi jemiyet qurulmisi, tebii bayliq, shu milletning universal sapasi, izdinishi, köngel qoyishi, tirishchanliqi, izchilliqi we qet'i boshashmasliqi qatarliq köp xil amillar bilen munasiwetlik. Melum bir milletning ilghar yaki qalaqliqi, horun yaki ishchanliqi, hergüzmu u milletning pishanisigha pütülgen, özgermes nerse bolmastin, belki u köpligen ichki we tashqi amillar bilen munasiwetlik bolghan, hem waqit sharahitning özgürishige egiship özgürep turidighan nerse.

Albirt Eynistin mundaq digen iken, "Muapiqiyet qazinish, insanlarning qizziqishi, köngel qoyishi, qetii boshashmasliqi we öz özini tenqit qilishidin meydan'gha kilidu"

Bizde “tazni taz diseng ölgisi kiler, saqni taz diseng külgisi kiler” deydighan ata sözi bar bolup, bu digenlik bishi saq insanlar bashqilarning özini taz diyishidin endishe qilmaydu, eksinche taz insanlarning eng endishe qilidighini, bashqilarning özini taz diyishudur dimektur. Yeni özige ishenchisi bolmighan we yaki eyipi köp bolghan insanlar, öz eyipini ichishtin we yaki öz özini tenqit qilishtin eng endishe qilidighan insanlardur.

Insanlarning öz özini tenqit qilishi we yaki öz eyipini ichishi, alahide dadilliq telep qilidighan bir xil semimi qilmish bolup, u ajizliqning emes belki her jehettin piship yitilgenlikning we küchlüklikning alamitidur. Yeni insanlar öz özini tenqit qilip we yaki öz eyipini ichip, uningdin yaxshi netijige irishishi üchün, aldi bilen küchlük bolishi we öz özini qoghdishi kapaletke ige bolishi kirek. Undaq bolmighanda, yeni özini qoghdash kapaletke ige bolmighan ajiz orunda turghan kishiler öz özini tenqit qilghanda, özini tiximu passip orun'gha chüshürüp qoyidu we öz özini inkar qilish, özini bu dunyagha yük dep qarash, chüshkünlishish qatarliq yaman aqiwetler kilip chiqidu.

Martin Luzir King mundaq digen iken, "Insanning öz özini tenqit qilish sewiyesige yitishi, hergüzmu ajizliqning ipadisi bolmastin, belki u yükesek derijide mükemmellishishning ipadisidur."

Insanlarning özini qoghdushi insanlarning tebii we tughma bolghan iptidayi adetliridin biri bolup, bashqilarning eyiplishige qarshi turup, özini aqlishimu insanlarning shu tughma özini qoghdash aditi dairsige kiridu. Insanlarning özini qoghdash ingi we ihtiyaji, insanlarning bowaqliq, baliliq we ajiz waqitlirida eng küchlük bolidu. Buning tipik ipadiliri, bowaq we balilarning dawamliq ata anisining qolini tutishi, ikki adem urushup qalghanda ajiz terep aldi bilen bekrek dawrang silishi we aldi bilen qoligha qoral ilishi qatarliqlardur. Insanlarning yishining chongishigha, jemiyettiki orning yüksilishige we özige bolghan ishenchisining iship birishigha egiship, insanlarning özini qoghdishi kapaletke ige bolidu we özini qoghdashqa bolghan ihtiyaji töwenlep mangidu.

Herqandaq bir millet we yaki herqandaq bir shexis özini qoghdiyalighidek halgha kelmigiche, u millet yaki u shexis özining eyipini ichishqa hazir emes, yeni u millet yaki u shexis özining eyipini ichishni qobul qilalishi we öz özini dadilliq bilen tenqit qilalishi asan emes.

Melum bir milletning öz eyipini ichishni we yaki öz özini tenqit qilishni qobul qilish qilmasliqi, u milletni teshkil qilghuchi her bir insan yaki kem digende u milletke tewe bolghan köp sandiki insanlarning her jehettin piship yitilish ehwali we öz özige bolghan ishenchisi bilen zich munasiwetlik. Uzun muddet mustemlike astida yashighan yaki bashqilar teripidin uzun muddet bozek qilin’ghan milletler uzun muddet adaletsizlik ichide yashighanlighi üchün, undaq milletning özige bolghan ishenchisi töwen bolidu, özini qoghdash ihtiyaji yuquri bolidu, shu seweptin undaq milletler we yaki undaq insanlar tenqitni asan qobul qilalmaydighan bolidu, özining epipini ichishni yaxshi körmeydu. Dunyagha xoja bolghan milletler, öz özige ishenchisi yuquri bolghan insanlar, özining eyipini ichishni we öz özini tenqit qilishni, özini tiximu mükemmel qilishning eng yaxshi usuli dep qaraydu we uningdin özini qachurmaydu.

Mesilen, Amirka döwlet bolup shekillen'gendin buyan bolupmu yiqinqi 100 yildin buyan dunya saqchisi dep tonulup kelgende eng küchlük döwlet bolup, ikkinji dunya urushidin kiyin Amirkining xelqaradiki orni zor derijide mustekkemlen'gen. 1958- yili Amirkida, Amirkiliqlarning öz eyipini achidighan we öz özini tenqitleydighan "The Ugly American" yeni “Chakina Amirkiliqlar” deydighan bir kitap neshir qilin’ghan, we u kitap eyni waqitta köp sitilghan kitapqa aylan'ghan. 1963-yili u kitap hetta kino qilip ishlen’gen. Oxshashla öz özining eyipini achidighan we öz özini tenqitleydighan mezmunidiki kitaplar Firansiye, Yapuniye qatarliq tereqqi qilghan gherip dowletliride neshir qilin'ghan we keng oqurmenlerning qollushigha irishken. Xittaylarning öz özini tenqitleydighan mezmundiki "Chakina Jonggoluqlar" digen kitap 1985 - yili tunji bolup Teywende neshir qilin'ghan bolup, 1986 - yili Xittaydimu neshir qilin'ghan we 1987 - yildiki oqughuchilar herkitidin kiyin, u kitap hökümet teripidin cheklen'gen. 2004 - yili gerche u kitap qayta neshir qilinip tarqitilghan bolsimu, biraq mezmunigha köp özgertish kirgüzülgen. Yuqarqi ehwallardin shuni köriwilishqa boliduki, bir döwlet we yaki bir milletning öz kemchillikige toluq yüzlinelishi we öz özini dadilliq bilen tenqit qilalishi, u döwlet yaki u milletning özige bolghan ishenchisi bilen zich munasiwetlik.

Xittay döwlitige kelsek, u gerche hazir Amirkidin qalsa ixtizadi eng küchlük bolghan döwlet hisaplansimu, biraq meyli Xittay hökümiti bolsun we yaki Xittay xelqi bolsun, pisxika jehette tixi chong döwlet pisxikisi yitilgini yoq, heywisi chong bolghan bilen özige bolghan ishensi töwen. Hakimiyet xelqige ishenmeslik, xelq hakimiyetke ishenmeslik ighir. Pütün milletning pisxikisida gumanxorluq, bashilargha ishenmeslik, tehdit tuyghusi ighir; özini qoghdash ihtiyaji küchluk. Meyli Xittay hökümiti bolsun we yaki Xittay xelqi bolsun, ular öz ichidin kelgen we yaki sirittin kelgen tenqitke nisbeten, her daim uni qetti qobul qilmasliq pozitsiyeside. Hem shundaqla öz eyipini achqanlarni, weten söymeslik hetta döwletni parchilashqa urunush jinayiti bilen jazalap kelmekte.

Bizge nisbeten, 70 yildin buyanqi mustemlike hayat, duch kelgen adaletsizlikler, chekken japalar, öz teqdirimizni özimiz belgiliyelmeslik, özimizge özimiz xoja bolalmasliq, öz tariximizni ügünishtin mehrum qilishimiz, öz qimmet qarishimiz, öz itiqadimiz we öz exlaq pezilet ölchemlirimiz bilen terbilinelmeslikimiz, qisqisi her jehettin ajiz orun'gha chüshüp qilishimiz, pütün bir milletning yeni her birimizning özimizge bolghan ishenchisige ighir derijide tesir yetküzüp, bizning özimizni qoghadashqa bolghan ihtiyajimizni künsayin ashurup mangmaqta. Hem shundaqla hemmimiz özimizni qoghdashning qanchiliq mohim ikenlikini tonup yetmektimiz. Shu seweptin öz eyipimizni ichish mesilisige kelgende, biz nahayti sezgür bolup, uni asan qobul qilalmaymiz. Bu hergüzmu yalghuz bizning hazirqi weziyitimiz sewebidin kilip chiqqan mesile emes, hem shundaqla u bizning hazirqi weziyitimizning özgürishi bilen qisqa waqit ichide hel bolidighan mesilimu emes.

Öz özini mustekkemleymen digen her qandaq bir millet we yaki shexis, aldi bilen özining ötmüshidin sawaq ilishi, özidiki kemchillik we ajizliqni tonup yitishi, uningha dadilliq bilen yüzlishishi kirek. Biz hazir gerche pütün bir millet bolush süpitimiz bilen pütün millettiki illetlerni üzgertishke ajizliq qilsaqmu, biraq her birimiz ayrim ayrim bir shexis bolush süpitimiz bilen, choqum özimizdiki illetlerde özgürüsh hasil qilishimiz kirek. Her birimiz, eger özimizdiki kemchillik we yitersizliklerni tonup yetmisek, uning bilen dadilliq bilen yüzlishelmisek, ehwalimizda chong özgürüsh hasil qilishimiz qiyin. Bu dimek asan bolghan bilen, uni emilleshtürmek unche asasn emes. U her birimizning rohiy halitimizning piship yitilishi we özimizge, kelgüsimizge bolghan ishenchimizning küchiyishi bilen munasiwetlik. Shunga biz bir birimizni eyipleshtin waz kichip, özimizge we bashqilargha akitip küch ata qilip, kelgüsimizge bolghan ümütwarliqni küchaytishimiz, öz ara köyünishimiz, öz ara destek bolishimiz kirek. Biz peqet küchlen'gende, kelgüsimizge bolghan ümütwarliq we ishench kücheygende, andin biz öz yitersizlikimizge we kemchilikimizge dadilliq bilen yüzlineleydighan, öz özimizni tenqit qilalaydighan bolimiz. Biz peqet öz yitersizlikimizge we kemchilikimizge dadilliq bilen yüzlen'ginimizde, andin özimizning jümlidin millitimizning ehwalida tüp özgurushler peyda qilalaymiz we tiximu küchlineleymiz.

Paydilan’ghan matiryallar

Self-criticism and self-compassion

https://self-compassion.org/wp-content/uploads/2016/12/Self-Criticism.pdf

Understanding Self-Compassion

https://www.cci.health.wa.gov.au/~/media/CCI/Consumer%20Modules/Building%20Self-Compassion/Building%20Self-Compassion%20-%2001%20-%20Understanding%20Self-Compassion.pdf

Emotion in self-criticism

https://www.sciencedirect.com/science/article/pii/S0191886904003101